Русија најверојатно испраќа платеници во Украина за да помогнат во нејзината инвазија на земјата, соопшти британското Министерство за одбрана.
Владата на претседателот Владимир Путин „речиси сигурно одржува добри односи“ со руските компании кои продаваат услуги за „изнајмување“ на борци платеници, објави Министерството за одбрана на Обединетото Кралство.
Руските корпоративни борци се обвинети за кршење на човековите права во Сирија, Либија и Централноафриканската Република додека работеле во име на Москва, соопшти Министерството, пренесува CNBC.
Центарот за стратешки и меѓународни студии со седиште во Вашингтон минатата година соопшти дека Москва и обезбедувала безбедносни и воени услуги на централноафриканската влада преку таканаречените „приватни воени компании“ во замена за правото на екстракција на злато, ураниум и дијаманти.
Ваквите платенички служби веќе дејствувале во источна Украина пред сегашната руска инвазија, според американската влада.
Во 2017 година, американското Министерство за финансии воведе санкции за најголемата руска платеничка компанија PMC Wagner и нејзиниот основач Дмитриј Уткин за „дејства или политики кои го загрозуваат мирот, безбедноста, стабилноста, суверенитетот или територијалниот интегритет на Украина“.
Руските платенички компании, вклучувајќи го и Вагнер, „имаат лоша репутација – вклучувајќи оперативни неуспеси и кршење на човековите права“, соопшти американскиот Центар за стратешки и меѓународни студии.
Министерството за одбрана на САД во понеделникот објави дека Русија се обидува да регрутира платеници од Сирија.
„Сметаме дека вреди да се напомене дека (Путин) верува дека треба да се потпре на странските борци за да ги надополнат веќе моќните воени сили во Украина“, рече претставникот на брифингот.
