Бугарското Министерство за внатрешни работи ја избриша веста за апсењето на поранешниот премиер Бојко Борисов од својата интернет-страница, јави БГНЕС.
Претходно, беше објавено дека полиција влегла во домот на Борисов во Софија и го привела.
Во цела Бугарија во тек е голема заедничка операција на бугарските истражни органи и Европското јавно обвинителство. Се проверуваат досиејата на 120 луѓе, објавија медиумите.
Според досегашните информации, покрај Борисов, приведени се и поранешниот министер за финансии Владислав Горанов и поранешната шефица на буџетската комисија Менда Стојанова.
– Никој не е над законот, напиша бугарскиот премиер Кирил Петков на Фејсбук како коментар на информацијата за апсењето на Борисов.
Во меѓувреме, медиумите објавија и дека се забележани собири на приврзаници на ГЕРБ, а пред куќата на Борисов се наоѓаат стотици негови приврзаници.
