Вчера околу 21.30 часот кај местото Рајиќ близу Новска во Хрватска се судрија патнички и товарен воз и според последните информации, потврдено е дека загинале три лица, додека 11 се повредени.
Меѓу повредените има и неколку државјани на Иран. Загинатите се хрватски државјани.
„Околу полноќ биле донесени седум пациенти, двајца хрватски и пет странски државјани. Од лекуваните двајца пациенти се со тешки телесни повреди, а пет се со полесни повреди.
Никој живот не е во животна опасност. Станува збор за коскена траума кај потешко повредените“, изјави за ХРТ, Марио Шпољар, дежурен хирург во Општата болница во Нова Градишка.
На местото на несреќата е присутен и Томислав Антун Бибер, главен истражувач за железнички несреќи од Агенцијата за истражување на несреќи во воздушниот, железничкиот и поморскиот транспорт.
„Очигледно е дека патничкиот удрил во товарниот воз кој бил во дефект. Според некои информации, патничкиот воз не застанал на сигналот за застанување“, изјави Бибер.
Како што дознава Индекс, патничкиот воз се движел со брзина од 100 километри на час кога налетал на неисправниот воз. Тој помина на црвено светло пред да удри во запрен товарен воз со полна брзина.
„24 сата“ објави сведоштво на жена која била на местото на несреќата. Таа вели дека сцената била премногу мачна, поради што набргу морала да замине.
„Живеам во близина. Дојдов таму по половина час, главно беа млади луѓе. Изгледаше страшно. Рекоа дека има 12 загинати луѓе, многумина се повредени.
Страшно, болно, морав да го напуштам местото на несреќата. Огромна трагедија, луѓето плачат. Ужас“, вели жената за хрватскиот портал.
Локалната полиција досега соопшти дека околу 21:35 часот добила пријава дека патнички воз удрил во запрен товарен воз близу местото Рајиќ.
Премиерот Андреј Пленковиќ, по посетата на местото на тешката железничка несреќа во местото Рајиќ кај Новска, изјави дека според досегашните податоци, загинале три лица, а 11 се повредени. Од повредените според него никој не е во животна опасност.
„Неколку повредени лица се хрватски државјани, а неколку се странски“, потврди Пленковиќ, истакнувајќи дека информации за нив може да се добијат од Црвениот крст во Новска.
Тој не сакаше да зборува за идентитетот на загинатите пред да бидат проверени и најави дека жупаниското државно правобранителство од Сисак треба да излезе на терен да го утврди и соопшти.
