Управата за финансиска полиција и Министерството за внатрешни работи влегоа во ЈП „Водовод и канализација” – Скопје, потврдија за МИА од Основното јавно обвинителство (ОЈО) и од скопски „Водовод”.
Од ОЈО велат дека е известен јавен обвинител и дека обвинителството ќе постапи согласно надлежностите,
доколку органите во чија надлежност е откривањето на криминал утврдат елементи на кривично дело.
Во овој момент обвинителството има консултативна и координативна улога и јавниот обвинител редовно се известува за преземените дејствија.
Доколку органите во чија надлежност е откривањето на криминал утврдат елементи на кривично дело, обвинителството ќе постапи согласно своите надлежности, велат од ОЈО.
Финансиската полиција и градоначалничката Данела Арсовска засега не се огласуваат околу денешните настани.
Арсовска неделава соопшти дека го разрешува в.д. директорот на ЈП „Водовод и канализација”, Златко Перински,
обвинувајќи го дека за покажувал самоволие, но и за малверзации со тендерот за изградба на пречистителна станица за води во Скопје, вреден 136 милиони евра.
Перински за овие наводи најави тужба против градоначалничката, а таа возврати со ново обвинување – дека досегашниот в.д. директор вработил сто луѓе во претпријатието, од кои поголемиот дел не оделе на работа, а земале плата.
По ова, оставки поднесоа и директорите-кадри на ВМРО-ДПМНЕ на уште неколку градски јавни претпријатија,
а Арсовска и партијата со чија поддршка беше избрана на функцијата, се во отворена „војна“ со препукувања.
Извор: Слободен Печат
