Legendarni Đanluiđu Bufon, koji se nakon jedne sezone iz PSŽ-a vratio u Juventusa, u srijedu uveče upisao se u „zlatnu knjigu“ Serije A.
Bufon je profesionalnu karijeru počeo u Parmi, a sa 23 godine prešao je u Juventus. Bilo je to na ljeto 2001. godine, a u Torinu je ostao do ljeta 2018, kada se na jednu sezonu preselio u Francusku i nastupao za PSŽ.
No, ljetos se ponovo vratio u Juventus i pristao da bude zamjena Poljaku Vojčeku Ščensnom. Iskusni Italijan uskače kada prvi golman nije spreman, a tako je bilo i u srijedu uveče na utakmici sa Sampdorijom.
Nastupom u Đenovi, Bufon je izjednačio rekord Paula Maldinija po broju odigranih utakmica u elitnom rangu italijanskog fudbala. Obojica sada imaju po 647 nastupa, a iza njih je ostao Frančesko Toti sa 619.
Bufonu aktuelni ugovor ističe na kraju ove sezone 2020. godine, a Juventus mu je, prema pisanju ,,Kalčomerkata“, već ponudio novi jednogodišnji ugovor.
Očekuje se da će 41-godišnji Italijan prihvatiti produženje ugovora i potpisati u narednim danima. Prema novog ugovoru, Bufon bi u ‘Staroj dami’ trebalo da ostane najmanje do ljeta 2021. godine.
Iako su mnogi očekivali da će legendarni golman nakon ove sezone okačiti rukavice o klin, od toga, po svemu sudeći, neće biti ništa!
