Inter je u minulom kolu Serije A remijem sa Romom na svom terenu (1-1) zadržao prednost u odosu na rivale sa kojima se bori za mjesto koje vodi u Ligu šampiona sljedeće sezone.
Na tom meču od 54.minuta umjesto Naingolana u igru je ušao bivši kapiten Mauro Ikardi.
Jedan dio stadiona je aplaudirao kada je Ikardi ulazio dok je “sjeverna tribina” na kojoj se nalaze najvatreniji navijači Intera uputila niz pogrdnih komentara na njegov račun.
I ne samo to “Curva Nord” je na ružan način opisala i one navijače Intera koji podržavaju Ikardija nazivajući ih “grbavcima” (pogrdan naziv za navijače Juventusa).
– Taj mali čovjek koji nosi našu ‘devetku’ ne zaslužuje da igra za Inter jer nije pokazao ni minimum profesionalne korektnosti za boje koje nosi, za navijače ili makar za klub koji ga plaća. Jasno je da ‘broj 9’ ne može biti nešto oko čega bi trebalo graditi budućnost kojoj se nadamo. Da li ste u nekom drugo šampionatu nekada vidjeli igrače da odbijaju da igraju, da izmišljaju da su povrijeđeni, da se smiju kada njihov tim izgubi, i koriste advokate da se vrate u tim koji su napustili – stoji između ostalog u saopštenju “Curve Nord”.
Jaz između najvatrenijih navijača Intera i Maura Ikardija je ogroman i gotovo je izvjesno da popravke situacije između njih neće ni biti.
