U sklopu 16. kola italijanske Serije A na programu je derbi Fiorentine i Intera na „Artemio Franchiju“ u Firenzi sa početkom u 20:45 sati po srednjoevropskom vremenu.
Dolazak Roka Komisa na predsjedničku funkciju u Fiorentini pokrenuo je seriju dovođenja poznatih pojačanja poput Riberija i Boatenga, kao i ostanak zlatnog dječka kluba Kijeze, ali nije donio i očekivane rezultate.
Montela je i u Toskani pokazao da je upitno koliko je zaista dobar trener, pa ne čudi da mu italijanski mediji već nedjeljama predviđaju otkaz.
Između ostalog, Fiorentina je izgubila posljednje četiri ligaške utakmice, slavila je tek jednom u posljednjih osam kola, pa derbi sa Interom čeka sa samo četiri boda prednosti od zone ispadanja.
Montela zbog povrede za utakmicu ne može da računa na iskusnog Riberija koji će odsustvovati sa terena oko dva mjeseca. Očekuje se da će Viola istrčati u 3-5-2 formaciji s Vlahovićem uz Kijezu u špicu napada.
Inter je propustio šansu da u utorak izbori plasman u nokaut fazu Lige šampiona trijumfom nad „rezervnim“ timom Barselone koja je u Milanu nastupila bez najvećih zvijezda.
Svakako treba reći da ‘Nerazzurri’ nisu imali sreće jer su im poništena čak tri gola na utakmici, ali činjenica je da su glavni razlog Interovog ispadanja brojne povrede i nedostatak širine igračkog rostera.
Inter nastavlja evropsku sezonu u Ligi Evrope, ali sada je potpuno jasno da će se svi u klubu potpuno fokusirati na pokušaj rušenja sedmogodišnje dominacije Juventusa u Seriji A.
Inter je na vrhu Serije A sa dva boda više od mrskog rivala iz Torina i najveći je cilj kluba do kraja sezone da vrate ‘Scudetto’ na ‘Giuseppe Meazzu’.
Konte bi nakon razočaravajućeg ishoda utakmice s Barselonom trebalo da osvježi postavu novim licima, ali s obzirom na povrede i manjak širine kadra nema previše opcija.
Zbog povreda u konkurenciji za nastup nema Galjardinija, Barele i Sensija pa se od prvog minuta uz Brozovića očekuju Borha Valero i Vesino, a Konte ne može da računa ni na beka Kandrevu i napadača Aleksisa Sančeza.
Očekuje se da će protiv Fiorentine priliku od prvog minuta dobiti mladi Bastoni kako bi veteran Godin dobio potreban odmor. Iznenađenje se očekuje na krilnim pozicijama, gdje bi trebalo da zaigraju D’Ambrozio i Lazaro, koji je ljetos doveden iz berlinske Herthe.
